ИРАН
Извадок од подолг мој текст, геополитичка анализа, со наслов HEARTLAND И СТРАТЕГИЈАТА НА АНАКОНДАТА, кој го објавив во 2007 година, во тогашен „Фокус“. Го постирам колку да се потенцира значењето на Иран. Тогаш на многумина не им беше јасно, денес веќе речиси сите со елементарен капацитет за размислување знаат што се случува на оваа тажна планета.
……………………
„Како и да е, стариот принцип на Мехен, т.н. „Стратегија на Анакондата“ (притисок и задушување на крајбрежните, периферни области на Евроазија во обрачите на атлантистичката моќ) е повторно на дело, со цел ослабнување и разнебитување на Heаrtlаnd/Русија. Денес, геополитката на атлантизмот/НАТО буквално ја применува таа стратегија. Не случајно, неодамнешната интервенција на САД во Авганистан беше официјално наречена Операција Анаконда. Нејзините спирали се движат од Британија и Западна Европа, низ т.н. „санитарен кордон“ меѓу Европа и Русија, инсталиран од англосаксонците (прибалтичките држави, Полска, Чешка, Романија и особено Украина – до Црно море; натаму извива во Турција, јa „закачува“ Грузија, го дестабилизира Кавказ, па во Централна Азија „ги држи“ Пакистан и сега Авганистан, неуспешна е во Казахстан, делумно во Узбекистан, Киргистан и Таџикистан, го завладеа Ирак, сака да ја дестабилизира Индија преку Кашмир и контролата на Индискиот Океан, ги опфаќa повеќето земји од Југоисточна Азија и Тајван (провоцирање на Кина), за опашката на „анакондата“ цврсто да ги стегне Јапонија и Јужна Кореја. Во сите тие земји атлантизмот има или се обидува да има пресудно влијание во внатрешната политика. САД/НАТО најмногу „висат“ со Иран чија централна позиција (регионален хертленд, дел од глобален римленд) „како со нож го расекува телото на анакондата“. Овде се концентрира потенцијал за досега невиден судир, затоа што оската Москва-Техеран (преку Ереван) е клучна линија за стратегиско обединување на Евроазија на Југ („излез на јужните мориња“). Затоа, САД се „острат“ против Иран.“
Крум Велков
утрово, 08.01.20