И З Ј А В А
Д О Н О С И Т Е Л И Т Е Н А С У В Е Р Е Н И Т Е Т О Т Н А Д Р Ж А В А Т А –
Г Р А Ѓ А Н И Т Е Н А Р Е П У Б Л И К А М А К Е Д О Н И Ј А
Доставена преку Претставничкиот дом –
Собранието на Република Македонија
Изјавувам под целосна материјална, морална и кривична одговорност, при чиста совест и здрав разум, дека не признавам правни, политички и финансиски долгови создадени и предизвикани, во мое име и за моја сметка, од страна на нелегалната и нелегитимна Влада избрана врз основа на договори што се во спротивност со Уставот и со уставното уредување на Република Македонија, како и се спротивни со принципите на меѓународното право, важечките меѓународни договори ратификувани од страна на Република Македонија и Резолуциите на Генералното Собрание на Обединетите Нации.
Принципот на немешање во домашните, внатрешните работи на независните држави е еден од најцврсто воспоставените принципи на меѓународното право. Забраната за мешање во внатрешните работи на државите е суштински дел од правото и политиката на секоја држава да има свој суверентитет, да има сопствен територијален интегритет и сопствена политичка независност. Повелбата на ООН, во член 2 прецизно наведува дека ООН е заснована на принципот на суверената еднаквост на сите нејзини земји-членки. Сите земји-членки треба да ги решаваат споровите на мирен начин без загрозување на меѓународниот мир, безбедност и правда, и дека во меѓународните односи сите земји-членки не смеат да го загрозуваат територијалниот интегритет и политичката независност на која било држава.
Од друга страна, и во Декларацијата за принципите на меѓународното право што се однесуваат на пријателските односи и соработка меѓу државите во согласност со Повелбата на ООН [UNGA res. 2625(XXV) 1970] стои обврската за немешање во домашните работи на која било која држава. Генералното Собрание на ООН има усвоено Декларација за недозволеноста за интервенција и мешање во домашните работи на државите (UNGA resolution 2131 (XX) 1965), а принципот е исто така потврден и од страна на Меѓународниот суд на правдата во случајот “Никарагва”.
Имајќи ги предвид важечките одредби од Уставот на РМ, сите законски норми содржани во позитивното право на РМ, како и ратификуваните меѓународни договори, ги сметам за ништовни и не ги признавам правните акти донесени од нелегалната и нелегитимната власт инсталирана во месец јуни 2017 година со кои целосно се нарушуваат суверенитетот на државата, нејзиниот територијален интегритет, политичката независност и уставно-правниот поредок на Република Македонија. Во превод, сите акти предложени од нелегалната Влада, а доставени до нелегално избраниот Талат Џафери на функцијата Претседател на Собранието на РМ, не ги признавам, и нема да ги применувам во правниот промет.
Изјавувам дека не ги признавам и нема да ги применувам во правниот промет:
- Договорот за добрососедство преговаран од страна на нелегалната Влада и ратификуван од страна на Собранието на Република Македонија со кое претседава нелегалниот Претседател на Собранието на Република Македонија.
- Задолжувањата на граѓаните на Република Македонија преку различни форми на странски кредитирања и издавање на домашни и странски обврзници од моментот на избор на нелегалната Владата на Република Македонија.
- Против-уставнот закон за употреба на јазиците предложен од страна на нелегалната Влада, а усвоен од страна на Собранието на Република Македонија со кое претседава нелегалниот Претседател на Собранието на Република Македонија, доколку биде повторно нелегално изгласан спротивно надоставените забелешки од научната и стручната јавност, како и од Претседателот на Република Македонија, Ѓорѓе Иванов.
- Какво било решение за спорот за името кое е во спротивност со Резолуциите на Советот за безбедност на ОН со кое ќе се направи обид за промена на Уставот на Република Македонија, како и во меѓународната употреба на нашето име. Нема да го признавам за свое кое било ново име со кое се менува Македонскиот идентитет, Македонскиот јазик, Македонската историја и име кое го нарушува достоинството на мојот народ, и стратешките интереси на мојата земја.
Исто така, изјавувам дека ќе сторам се што е во рамките на моите можности да ја информирам севкупната македонска јавност за инфлаторната против-уставност што е создадена во последниве години, со цел заштита на националните интереси на Република Македонија.
Подносител на Изјавата
————————
Ова погоре е изјавата што во понеделник на 29ти јануари јас и Мирка ќе ја доставиме на адреса на следните институции и нивните архиви:
- До архивата на Собранието на Решублика Македонија, ул. 11 Октомври бр. 10. Скопје
- До канцеларијата на Претседателот на Република Македонија Ѓорѓе Иванов, Ул. Ацо Карамнов 33А Скопје.
- До архивата на Владата на Република Македонија, Булевар Илинден Бр. 2, Скопје.